Chustizia en as carreras, isto ye o que demandamos con firme combizión y muito en serio, pero de bez con simpatía, groxiando. Os coches nos imposan a suya lei: belozidat, prepotenzia, “malos fumos” y biolenzia. Por ixo en desplazar-nos en bezicleta cada día por a ziudat combertimos a nuestra mobilidat en un acto de desobedenzia cutiano. Si amás nos manifestamos en bezicleta y espullaus combertimos a desobedenzia en una protesta exemplar.

A Cordinadora de Coleutibos Ziclonudistas (CCZ) d’Aragón crida a fer manifestazions ziclonudistas en ziudaz de tot o mundo, chunio de 2011.

Denunziamos que as nuestras carreras han estau segrestadas por o coche pribau que boza as ziudaz, que esdebienen puestos furos y periglosos. O coche mata y a suya impunidat nos xorronta. Masiaus intereses de multinazionals belizistas d’o petrolio y de l’automóbil son en chuego si isto se custiona. Proposamos un modelo de ziudat an as personas recuperen o suyo espazio, an s’achican as nezesidaz d’esplazamiento y s’apueste por o peteniador (que somos todas y toz) y por os meyos de tresporte menos contaminans y más eficazes.

Por qué a bezicleta? A bezicleta ye un meyo de tresporte urbano solbén, saludable, ecoloxico y dibertiu. Ye un icono, un simbolo de libertat y una aina prautica de tresformazión sozial. No peita, no gasta petrolio, no colabora con o desarrollismo esferrador ni con a guerra global.

Por qué espullaus? Porque nos sentimos espullaus debán o transito, por a manca de respeto de os adugadors y a desidia d’os gubernans. Espullaus femos beyible a fraxilidat d’as nuestras carrozerías (o nuestro propio cuerpo). Amás, amostramos o nuestro cuerpo con naturalidat, crebando a pudor, esmuntando tabús en o tocante a o nuestro fesico, imposaus por a moda y l’angluzia d’a industria testil. A la finitiba, nos concaramos con o trafico urbano con o cuerpo espullau sobre a bezicleta como a millor traza d’esfender a nuestra dignidat y de bibir a luita sozial.

Libera o tuyo esmo y o tuyo cuerpo! Esfruta d’una gambada unica por o zentro d’a tuya ziudat!
Apunta-te a la trasgresión, a la irreberenzia y no pidas premiso! Entalto os indios metropolitans!
Tabaxo a ropa y entalto a bizi! Crema l’auto!
Luenga vida a la CCZ!
Chustizia en as carreras!

info@ciclonudista.net